Sisia SMP Negeri 2 Mendoyo Ngwerdiang Kearifan Lokal Sajeroning Rahina Saraswati

Rahina Suci Saraswati Pinaka rahina sane dahat mautama pisan sane kamargiang nyabran ngenem sasih apisan tepetnyane ring rahina Saniscara Umanis, Wuku Watugunung. Rahina puniki pinaka galah ngaturang piodalan majeng ring Ida Sang Hyang Aji Saraswati sane ketah kabaos Dewi Saraswati pinaka pralambang sahananing aji (pengetahuan), seni, miwah kawicaksanan (kebijaksanaan). Taler rahina puniki dahat mautama kawentenannyane sajeroning pamargin aguron-guron sakadi sekolah, kampus, miwah kulawarga sane madue tetamian marupa sastra Bali.

Sajeroning nyanggra rahina Saraswati nemoning pinanggal 8 Februari 2025, SMP Negeri 2 Mendoyo ngamargiang makudang-kudang wimbakara sakadi, makarya pajegan, sate lilit miwah lawar, tur maning banten pajati muah ajengan. Samian wimbakara punika madue tatujon mangda para sisia prasida ngamargiang 7 (tujuh) Gerakan Anak Indonesia Hebat (AIH) sane kaanggen nyantenang nilai agama, gemar belajar, lan bermasyarakat sane dados wentuk saking kepatutan sane manggeh ring sisia sami.

Sajeroning wimbakara pajegan kamiletin olih para sisia istri saking kelas IX, punika taler ring wimbakara makarya sate lilit miwah lawar puniki kasarengin olih sisia lanang kelas 7, 8, lan 9, miwah wimbakara makarya pajati lan ajengan kamiletin olih sisia istri saking kelas 7 lan 8.

Maka pangawit wimbakara ring pinanggal 7 Februari 2025 puniki kapungkah olih Bapak Kepala SMP Negeri 2 Mendoyo I Putu Gunarsa, S.Pd., M.Pd.. Sajeroning pamargi para sisia seneng pisan nyarengin wimbakara puniki sane katuntun olih wali kelas soang-soang. Sami nyihnayang rasa subakti madasar antuk ngayah (gotong royong), makumanyama, saling asah, asih, miwah asuh. Napi malih ri kala makarya kairing olih gegitan saking sekaa shanti SMP Negeri 2 Mendoyo sane dahat ngulangunin.

Ring tanggal 8 Februari 2025 pinaka piodalan ida sang hyang aji saraswati. Makasami warga SMP Negeri 2 Mendoyo sregep nyarengin pamuspan sane magenah ring Padmasana sekolah. Ri sampune ngaturang bakti kalanturang antuk sesolahan Rejang Dewa saking sisia SMP 2 Mendoyo miwah Rejang Sari saking guru-guru istri. Majanten parikrama puniki mapaiketan ring Kebiasaan Anak Indonesia Hebat (AIH) inggih punika Beribadah. Pangaptinnyane mangda ngamenggahang parikrama puniki prasida nincap kawentenannyane.