SMP Negeri 2 Mendoyo Ngamolihang Jayanti I & II Wimbakara Nyurat Lontar Tingkat Kabupaten

Bulan Bahasa Bali kamargiang nyabran warsa apisan tepetnyane ring Bulan Februari. Majanten ring bulan puniki pastika pacang ngamargiang sakancan parikrama sane mapaiketan ring nglestariang basa, sastra, miwah aksara Bali mawit saking soang-soang desa adat miwah dinas, kabupaten, rauh ring provinsi. Ri sampune parikrama bulan bahasa Bali kapungkah ring Provinsi Bali, majanten pacang kasarengin olih genah-genah tiosan sakadi ring Kabupaten Jembrana.

Kabupaten Jembrana ngamargiang Bulan Bahasa Bali ring Rahina Sukra, 7 Februari 2025 antuk ngamargiang makudang-kudang wimbakara, sakadi nyurat aksara Bali, nyurat lontar, masatua, sambrama wacana, dharma wiwada, miwah ngwacen lontar. Ring jenjang SMP puniki kamargiang wimbakara nyurat lontar. Soang-soang sekolah SMP sane wenten ring Kabupaten Jembrana nyarengin parikrama puniki antuk ngamedalang kalih pamilet. Sane pinaka duta SMP Negeri 2 Mendoyo inggih punika, I Made Angga Bagus Pradipta saking kelas IX A miwah Ida Ayu Ketut Pradnyan Paramita saking kelas IX A.

Sajeroning pamargin wimbakara miwah panureksan saking angga diaksa kajantenang jayanti sajeroning wimbakara nyurat lontar puniki. Sane dados jayanti I kapolihang olih I Made Angga Bagus Pradipta miwah jayanti II kapolihang olih Ida Ayu Ketut Pradnyan Paramita. Dadosnyane makasami duta SMP Negeri 2 Mendoyo ngamolihang jayanti ring wimbakara nyurat lontar puniki. Parindikan puniki sangkaning utsahan para sisia, guru pembina miwah sekolah sane kamanggalain olih I Putu Gunarsa, S.Pd., M.Pd. Salanturnyane sisia sane polih jayanti I pacang nglanturang nyarengin wimbakara ring tingkat Provinsi Bali. Majanten pangaptinnyane prasida nglanturang ngamolihang pikolih sane becik puniki.