Jayanti 1 Nyurat Lontar durung Magingsir

Sajeroning utsaha nglestariang kawentenan basa, sastra, miwah aksara Bali, SMP Negeri 2 Mendoyo (Spenduyo) setata nyokong inggian parikrama miwah wimbakara sane sane kamargiang. Salah tunggal wimbakara sane kasarengin ring rahina, Buda, 31 Mei 2023 inggih punika Nyurat Aksara Bali ring Lontar. Parikrama puniki kamargiang olih Dinas Perpustakaan miwah Kearsipan Daerah Kabupaten Jembrana sane maprakanti sareng Penyuluh Bahasa Bali Kab. Jembrana.

Spenduyo kangganin olih kekalih srikandi sane majanten sampun nglintangin pembinaan sane dahat meweh miwah nelasang galah sane nenten akidik. Sisia sane ngangganin mawasta (1) Ni Kadek Vina Dwi Arianti (VIIC), (2) Ida Ayu Ketut Pradnyan Paramita (VIIA). Antuk utsahan para sisia sane nenten surut-surut, majanten mapikolih ring parikramane puniki. Ni Kadek Vina Dwi Arianti ngamolihang jayanti 1 tur maning ngukuhang sekolah sane kamanggalain olih Bapak I Putu Gunarsa, S.Pd., M.Pd puniki durung prasida kagingsirang ring jayanti pinih duur.

Manut guru panuntun sane mawasta I Made Surianta, S.Pd. miwah Ni Putu Nita Dewi Astuti, S.Pd. Para sisia dahat sumeken (disiplin) ri kala nyarengin pembinaan puniki taler nyihnayang moto Pamurtyaning Semadi Aji prasida kajujur.

Penulis: Surianta